نصائح ازاي تزود انتاجيتك وتكون اسرع في شغلك

انتاجيتك في العمل وسرعتك في انجاز المهام هما اهم مقياس بيحدد مستواك وقيمتك في مكان عملك ووسط فريقك. كل ما كانت انتاجيتك اعلي وكل ما كنت سريع في مهامك كل ما هيتم تقديرك مادياً معنوياً وهتلاقي فرص افضل وهتكون علي مستوي المنافسة المطلوب بين اقرانك. السرعة والانتاجية وانجاز المهام هما افضل ميزة ممكن تكون موجودة في المبرمج خصوصا وواحدة من اهم مقاييس الاختيار في التوظيف. وعلشان كده دي بعض النصائح الي ممكن تساعدك تزود انتاجيتك وسرعتك وراحتك في عملك:

  1. استخدام الادوات المناسبة في التكنولوجي بتاعتك.

    دور علي افضل IDE سهل وسريع وال plugins المناسبة للتكنولوجي الي بتشتغل بيها الي تساعدك علي اكتشاف الاخطاء وحلها بسرعة وسهولة. بالاضافة طبعا لافضل حاجه تم اختراعها علشان تسهل علي المبرمجين وهي ال Auto Complete. اتقن استخدامة واتدرب عليه لانه هيوفر عليك وقت كبير جدا.

  2. حدد وقت محدد او هدف زمني والتزام بيه

    مهما كانت العواقب والظروف حتي لو قابلك مشاكل حاول تلتزم بالوقت وتضغط علي نفسك كنوع من الالزام لنفسك. ومكافآة نفسك لو خلصت قبل ميعادك. تهذيب النفس من اهم عوامل الارتقاء بيها.
  3. وقت العمل للعمل. وقت الراحة للراحة

    متخلطش بين الاوقات علشان متتعبش. التزم دايما انك تخلي وقت العمل محدد ومعلوم في يومك وبلاش خلط وقت العمل والراحة ببعض. متشتغلش خارج مواعيد العمل الا للضرورة القصوي او الحالات الطارئة. ومتريحش وقت العمل الا لو كنت مضطر لكده. الالتزام بوقت محدد للعمل والرحة هيخليك مهيآ نفسياً للعمل وقت العمل والراحة والاسترخاء خارج اوقات العمل.
  4. التركيز والانعزال عن عوامل التشتيت.

    لما تكون عاوز تركز وتزود انتاجيتك حاول تفصل عن كل ما قد يشتت تفكيرك. اشعارات الميل والسوشيال ميديا والرسائل من اهم عوامل التشتيت. حاول قبل ما تبدآ شغل تكون عامل Check علي كل الحجات دي ورديت علي الي انت محتاج ترد عليه وبعدها اقفل اشعارات موبايلك واللاب توب وكل البرامج اثناء شغلك لحد ما تخلص او تاخد بريك.
  5. حط هدف لانجازة في يومك.

    لما تبدآ شغل حط قدامك هدف تخلصة. مثلا انك خلال 4 ساعات هتخلص Module معين او Feature معينة او تاسك معين. بلاش تفصل او تقوم من مكانك الا لما تخلص هدفك. لو خلصت بدري كافئ نفسك براحة او عمل حاجه مسلية باقي الوقت الي وفرتة. لو اتآخرت حاول تحدد اسباب تآخيرك وسجلها في نوت واتآكد انك هتتجنبها بعد كده.
  6. كتابة كود نضيف يسهل قرآته والرجوع الية واعادة استخدامه

    اعادة استخدام الكود من افضل المهارات واكثرها تميزاً للمبرمج. لانها هتوفر عليه وقت وجهد كبير في اعادة اختراع العجلة. لو قرآة كود الغير صعبة عليك جرب كل فترة تشوف مشروع من المشاريع المطروحة علي GitHub في تخصصك ونزل المشروع عندك وحاول تقرآ الكود وتشوف الديفيلوبر بيعمل ايه وحاول تعدل علي شغله. كل ما تقرآ اكتر كل ما هتتعلم اكتر وهتكتسب خبرات ومهارات اكتر.
  7. استخدم ال Automation قدر الامكان في المهام التقليدية

    لو متعرفش ايه هو ال Automation فهو تنفيذ بعض المهام بشكل آلي بدون تدخل منك او بتدخل محدود وبسيط. وغالباً بتكون في المهام التقليدية. كل مجال وله بعض التاسكات الي ينفع يتعمل فيها Automation بشكل ما بحيث تسهل علي الشخص مهامه وتقلل استهلاك وقته. ابحث عن ال Automation في تخصصك وابدآ اتعلم Automation ووفر علي نفسك جهد ووقت.
  8. لا تبذل جهد في المكان الغير مناسب

    لما يواجهك مشكلة توقفك عن شغلك بلاش تحاول مرتين وتلاته واربعه. بعد اول محاولة جرب تبحث عن المشكلة وتقرآ تجارب الغير وتختار الحل المناسب لك. بلاش تضيع وقت وجهد في امر ممكن بسهولة توفر الوقت لو فورا بحثت عن الحل المناسب في تجارب الغير. مش عيب الاستفادة من تجارب غيرك ابداً ولكن عيب تضيع وقتك وجهدك علي ما لا يستحق.

 

قولولنا في التعليقات ايه الممارسات الي بتعملوها بتخليكم اسرع وانتاجيتكم اعلي.

ولا تنسونا من الدعاء

نشر بواسطة

Hosam Zewain

Software Engineer, Operations Director

hosam@hosamzewain.com

اترك تعليقك هنا

لن يتم نشر عنوان بريدك الإلكتروني. الحقول الإلزامية مشار إليها بـ *


تفاصيل المقالة

فئة Programming Soft Skills Technology الكل
المشاهدات
تاريخ النشر 31 يناير، 2021